ورقة شجر

كل شوية، شوية هوا يحدفوها في حتة
وساعات تعدي عليها رياح خماسين تجيب داغها
وساعات تانية هي اللي بتطلع سلسفيل ابوها
بس منين النِفس؟
حتجيب نِفس منين وهي قرفانة من الهوا
قرفانة من المكان والزمان والألم والدوا
حاجة بلا
هي ورقة خنقها التراب
وحبات الرمل اللي بتجرح فيها
كل ما السما تقرر انها تزوم وتغضب
فتبعت عواصفها وقت اما يحلالها
وهي خربت مالطا؟ لا ماخربتش!!!
ايه اللي جرى؟ الست متضايقة ففشت خُلقها
هي يعني خربت مالطا؟ لا ماخربتش!!!
هي الورقة بس اللي اتداست
تراب، رمل، طين، مطر، اعاصير تنخر في جذعها
نشفت الورقة!!!
بس يعني خربت مالطا؟
لا مخربتش!!!
ايه اللي جرى؟ شوية هوا؟
ايه المشكلة؟
ولا أي حاجة.
يادوب دي حتة ورقة
اصفرت ونشفت من النحر في قلبها
جدرها اتكسر من الريح اللي بتدوسه
وهي مش لاقية مكان يتاويها
هي اللي غلطانة
ايه اللي جابها هنا؟
هي مش عرفاه ونفوذه؟
اقولك؟
انتَ صح، هي بنت كلب
لا، دي بنت ستين كلب
عارف ليه؟
علشان افتكرت ان الريح حبيبها
وتقدر بحبها تفوزه
بس اهو ده اللي صار
ونشفت الورقة وماتت
ومضت الريح في طريقها
تداعب اللي يحلالها وتفعص اللي يقف
في مهب الريح