اجري، اجري، اجري، اجري
متبوصش وراك
متبوصش قدامك
متتلفتش
متتنفسش
دور زي الطور في الساقية
واعطش وانت شيال المية
ومش عارف ترتوي
اجري لحد ما نعلك يدوب
وكمل جري وانت حافي
متقفش لما رجليك تنزف
انزف لحد اما تبطل تحس بالالم
انزف لحد اما الاحساس يروح
ابقى لوح
و مع كده، متبطلش تجري
اصل النزيف تكفير ذنوب
فصفي دمك من الهموم
صفيه من الحُرقة والوجع
ده مش دلع
دي محاولة لترجيع الحقوق
بعد السكات على العفن
بعد التفشي في الركام
بعد السُبات، بعد الندم
اجري جري الوحوش
ورا الخلاص المنتظر
بس اوعى توصل
اصلك لو وصلت تموت
ولو وقفت في نص السكة برده تموت
تتفرم تحت الجمال المسرعة
نحو السراب الملحوق
فاجري يا تعيس زي البهايم في القطيع
علشان كده بقى اسمها
جري الوحوش
No comments:
Post a Comment