اغلط و اندم و انسى انك غلطت
قوم
تاني يوم و غني و انسى الوش الكِشِر
اقف اتباهى بنفسك و قول انا زي الفل
ايه يعني اللي هايجرا لو نسيت و قلت "تُبت"
قوم سطر الكراس و شكل المكتوب
قوم زوق الكشكول و لون المرسوم
قوم قول انا اللي بادي و انا بمزاجي ناهيها
انا عمري ما اكابر لكن دي الحقيقة
قوم ارسم الابتسامة بتاعة كل يوم
قوم نافق و جمِّل كدبك على كل شكل و لون
قوم خادع زمايلك و اخدع نفسك معاهم
قول انا احسن من ناس كتير، قول انا احسن منهم
خد بملو ايدك الوان الطيف السبعة
لون بها السواد الطافح في قلبك
ارسم الضحكة العفيفة، البريئة، البشوشة
وغش بها نفسك وصدق كدبتك
وروَّح بليل و اغلطت واندم وانسى انك غلطت
و قول انا لسة قدامي دنيا و هصلح الغلط
و استغفر و توب و نام و تاني يوم قوم
واتمرمغ في عذابك اللي بتزيده كل يوم
ارسم الضحكة على وشك البسوم
و اهو ده بقى الطبيعي، انك تغلط و تنسى
و تكدب على نفسك بانك متحكم في الامور
لكن اليوم هايجي، و اعرف انه قرب
هتعيط و تقول يا رتني ما غلطت
ولحد ما تعرف غلطك، و تدوق طعم الندم
و المرة دي بجد حيبقى اجمد قلم
قوم غني و انسى غلطك و ارسم البسمة السعيدة
واتباهى بنفسك و صدق انها الحقيقة
قوم سطر الكراس، قوم زوق الكشكول
قوم ارسم الابتسامة بتاعة كل يوم
قوم نافق و جمِّل كدبك على كل شكل و لون
قوم خادع زمايلك و قول انا احسن من دول و دول
No comments:
Post a Comment